មួយរយៈពេលចុងក្រោយនេះ ChatGPT ទទួលបានការចាប់អារម្មណ៍ច្រើនមែនទែន ដោយវាជា AI ឆ្លាតវៃមួយដែលមានសមត្ថភាពខ្ពស់ ព្រោះវាអាចឆ្លើយតបជាចម្លើយ បានស្ទើរតែគ្រប់សំណួរតែម្ដង។ គូសបញ្ជាក់ផងដែរថា កាលពីចុងខែវិច្ឆិកា ឆ្នាំ២០២២កន្លងទៅ ស្ថាប័នស្រាវជ្រាវបច្ចេកវិទ្យាសិប្បបញ្ញានិម្មិត (AI) របស់សហរដ្ឋអាមេរិកឈ្មោះ OpenAI បានដាក់ដំណើរការបច្ចេកវិទ្យាថ្មីឈ្មោះ ChatGPT ។ បច្ចេកវិទ្យាមួយនេះ មានសមត្ថភាពក្នុងការសន្ទនា និងឆ្លើយរាល់សំណួរទៅកាន់អ្នកសិក្សា។ ក្រោយពីដាក់ដំណើរការបានមួយរយៈខ្លី បច្ចេកវិទ្យានេះត្រូវបានគេយកទៅប្រើប្រាស់ជុំវិញពិភពលោក និងបានធ្វើឱ្យកេរ្តិ៍ឈ្មោះរបស់ OpenAI កាន់តែល្បីខ្ទរខ្ទាររឹតតែខ្លាំងឡើង។ ChatGPT មានសមត្ថភាពក្នុងការវិភាគទិន្នន័យ ដោយសារក្បួនដោះស្រាយ AI អាចដំណើរការទិន្នន័យយ៉ាងច្រើនបានឆាប់រហ័ស កំណត់អត្តសញ្ញាណគំរូ និងការស្វែងរកទិន្នន័យមួយចំនួនដែលមនុស្សពិបាករក។ 

ChatGPT នឹងត្រូវដាក់ប្រើប្រាស់ជាច្រើនក្នុងស្ថាប័ន និងអាជីវកម្មដូចជា៖ វិស័យសុខាភិបាល វិស័យហិរញ្ញវត្ថុ ធនាគារ ទូរគមនាគមន៍ វិស័យអប់រំសិក្សាស្រាវជ្រាវ ពាណិជ្ជកម្មអេឡិចត្រូនិក (E-Commerce) ទីផ្សា រោងចក្រ សហគ្រាស និងជាពិសេសលើផ្នែកសេវាកម្មអតិថជន។ តាមរយៈការផ្តល់សេវាអតិថិជនប្រកបដោយប្រសិទ្ធភាព និងការឆ្លើយតប២៤/២៤ម៉ោ ងតាមរយៈ chatbots អាជីវកម្មនឹងទទួលបានការពេញចិត្ត និងការផ្តល់សេវាកម្មល្អដល់អតិថិជន។ នៅក្នុងផ្នែកហិរញ្ញវត្ថុ និងធនាគារ ChatGPT អាចជួយក្នុងការរកឃើញ និងការទប់ស្កាត់ការក្លែងបន្លំ ក៏ដូចជាការគ្រប់គ្រងគណនីផងដែរ។ នៅក្នុង E-commerce វាអាចជួយជាមួយនឹងការណែនាំផលិតផល និងបទពិសោធន៍ទិញទំនិញល្អៗពីក្រុមហ៊ុនជូនដល់អតិថិជន។ នៅក្នុងទីផ្សារ ChatGPT អាចត្រូវបានប្រើសម្រាប់បង្កើតយុទ្ធនាការផ្សាយពាណិជ្ជកម្ម និងការចូលរួមរបស់អតិថិជន។ សរុបមក ChatGPT អាចជួយឱ្យអាជីវកម្មធ្វើកិច្ចការប្រចាំថ្ងៃដោយស្វ័យប្រវត្តិ សន្សំសំចៃពេលវេលា និងធនធាន និងកែលម្អ ដកស្រង់បទពិសោធន៍របស់អតិថិជន។

យ៉ាងណាមិញ ទោះជាបច្ចេកវិទ្យានេះមានសមត្ថភាពបំពេញការងារបានច្រើនមុខក្ដី ក៏មិនអាចបំពេញការងារបានល្អឥតខ្ចោះនោះដែរ ដោយមានពេលខ្លះក៏ផ្ដល់នូវទិន្នន័យ ឬចម្លើយមិនត្រឹមត្រូវ ណែនាំប្រភព ឬមាតិកាមានការលម្អៀងជាដើម។ លើសពីនេះ ចំណេះដឹង និងទិន្នន័យអំពីព្រឹត្តិការណ៍ពិភពលោករបស់ បច្ចេកវិទ្យានេះ នៅមានដែនកំណត់នៅឡើយ និងមិនអាចផ្ដល់ចម្លើយពេញលេញគ្រប់ពេលនោះទេ៕

ប្រភព៖ - https://openai.com/blog/chatgpt

- https://www.researchgate.net/publication/368662952_A_Review_of_ChatGPT_AI%27s_Impact_on_Several_Business_Sectors